Makapahimulos og dugang suholan ang mga kawani nga motrabaho atol sa Semana Santa, sumala sa Department of Labor and Employment (Dole).
Ang Labor Advisory 4, series of 2025, pinetsahan niadtong March 24, 2025, ang Dole nilatid nga dunay usbaw sa ilang kobrahon ang mga empleyado nga nitrabaho niadtong Eid'l Fitr (April 1), Araw ng Kagitingan (April 9).
Lakip sa dunay usbaw sa madawat nga suholan ang nitrabaho sa Maundy Thursday (April 17), Good Friday (April 18) ug Black Saturday (April 19).
Ang Proclamation 727, nga giisyu sa President of the Philippines, nagdeklarar ning mga adlawa nga regular holidays ug special non-working day sa 2025.
Ang Maundy Thursday ug Good Friday giila nga mga regular holiday.
Kon ang empleyado wala motrabaho ning maong mga adlaw, makadawat gihapon sila og 100 percent sa ilang naandang suholan ug sa kinatibuk-an nga suholan matag adlaw.
Ang mga empleyado nga nagtrabaho sa regular holidays bayaran og 200 percent sa ilang basic wage sa unang walo ka oras.
Ang motrabaho sobra sa walo ka oras bayaran og dugang 30 percent sa matag oras nilang rate.
Ang Black Saturday gikonsiderar nga special non-working day.
Ang "no work, no pay" principle moaplay kon kini nalatid sa polisiya sa kompaniya o sa collective bargaining agreement.
Kon gitrabahuan ang Black Saturday, ang empleyado makaadawat og dugang 30 percent sa iyang basic wage sa unang walo ka oras nga trabaho.
Ang empleyado nga motrabaho og sobra sa walo ka oras makadawat og dugang 30 porsiyento sa ilang inoras nga suweldo.
Kon gitrabahuan ang mga special day nga naglakip sa day-off sa empleyado, ang employer mobayad og dugang 50 porsiyento sa basic wage sa unang walo ka oras sa trabaho.
Kon sobra sa walo ka oras nga gitrabahuan ang special day nga nahulog sa day-off sa empleyado, ang employer mobayad og dugang 30% sa inoras nga bayad sa maong adlaw. / CDF