Sagubangon na ni Filipino Eumir Felix Marcial ang iyang homecoming fight batok kang Thai Thoedsak Sinam karong Sabado sa gabii, Marso 23, 2024, sa Ninoy Aquino Stadium sa Malate, Manila.
Tinguha ni Marcial ning awaya ang iyang ikalimang sunodsunod nga kadaugan gikan sa iyang pagpanimpalad sa professional rank.
Nagsilbe kining usa sa mga hugot nga pagpangandam kang Marcial alang sa iyang pagkampanya sa umaabot nga 2024 Paris Olympics.
Sa labing ulahi niyang away, si Marcial nirehistro og 2nd round TKO nga kadaugan batok kang Argentine Ricardo Ruben Villalba niadtong Pebrero 11, 2023. Si Sinam naggunit og 23-13, 19KOs nga rekord. / ESL