‘Honest’ nga kawatan nadakpan

Jerom Bolo Cayanong nadakpan human mitug-an kon diin niya gitagoan ang iyang kinawat, /TAMPO
Jerom Bolo Cayanong nadakpan human mitug-an kon diin niya gitagoan ang iyang kinawat, /TAMPO

Nasakpan si Jerom Bolo Cayanong, alyas Bloods, nga siya ray nikawat sa mga butang niadtong mga na­ngaligo sa Easter Sunday nga naabtan og kaadlawon sa usa ka beach resort sa Brgy. Pooc, Talisay City.

Ang biktima nga si John Mar Abatayo Tejoc, 23, ulitawo, taga-Purok Matinabangon, Barangay Tabunok, Talisay City ug mga kauban, nangaligo sa beach resort sa Barangay Pooc.

Naabtan ang biktima og kadlawon niadtong Lunes, Abril 1, 2024 uban sa iyang lima ka mga barkada nga nagsaulog sa Easter Sunday sa Marso 31 sa maong resort.

Sa dihang manguli na unta sila, si Tejoc nakamatikod nga ang bag nga igo lang niya gibitay sa manobela sa iyang giparada nga motorsiklo nahanaw.

Samtang ang U-box sa iyang motorsiklo nalangkat na ug gipanguha ang iyang mga butang nga diha sa sud.

Gihulagway nga ngitngit ang dapit nga giparkingan sa motorsiklo hinungdan nga wa mamatikdi nga gipanginhasan kini sa kawatan.

Namatikdan sa mga batan-on si Cayanong nga nagbalikbalik sa baybayon ug sa dihang gipangutana, nitubag siya nga siya maoy tigbantay sa cottage.

Apan nagduda sila sa tinubagan ni Cayanong kay matod pa wa magkadimao sa ilang pagsukitsukit.

“Klaro man kaayong namakak, dili katarong sa pagtubag sa pangutana. Unya mi-offer siya: ‘Tultolan ta mo asa gilubong mga butang kinawat, ayaw ko’g dalha sa barangay’,” saysay ni Tejoc.

Gitultolan sila sa suspek ngadto sa may baybayon diin gilubong sa balas ang mga kinawat niini, dayon nikaratil og dagan palayo.

Nahitabo ang ginukdanay hangtod nga siya naapsan sa mga batan-on ug gi-turnover ngadto sa mga barangay tanod nga mao nay nidala kaniya sa Talisay City Police Station.

Nakuha ang mga butang nga gilubong sa balas mao ang relo nga nagkantidad og P1,500, power bank – P800, phone charger – P500, jersey, bicycle flashlight, bag, wallet nga adunay importanteng mga dokomento.

Matod pa ni Tejoc nga dili niya pasayluon si Cayanong ug tinud-on niya ang pagpasaka og kaso kay nadakpan na diay kaniadto ang suspek sa kasong ilegal nga drugas ug pagpangawat. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph