Gipanghimakak ni kanhi Bise Mayor sa Sugbo Donaldo “Dondon” Hontiveros ang mga alegasyon ni Bise Mayor Tomas Osmeña bahin sa pagpalit og mga telebisyon alang sa Palarong Pambansa nga kantidad og P120 milyones nga nangabasa sa tubig baha human sa kusog nga bunok sa uwan niadtong Hulyo 16, 2025.
Sa usa ka pahayag niadtong Sabado, Hulyo 26, 2025, matud ni Hontiveros nga “sayop ug misleading” ang akusasyon ni Osmeña.
Si Osmeña, uban nila ni Konsehal Harold Go ug kanhi Konsehal Joy Augustus Young, mi-inspeksyon sa mga naguba nga telebisyon nga gipamutang sa basement sa buhatan sa Department of Education (DepEd)—Cebu City Division sa may dan Imus sa dakbayan sa Sugbo niadtong Biyernes, Hulyo 25, 2025.
Giklaro ni Hontiveros nga ang mga telebisyon nga gikuwestiyon dili alang sa Palaro 2024, apan gipalit kini ubos sa computerization program sa DepEd.
Kining mga unit gituyo aron ipanghatag sa mga pampublikong eskwelahan aron mapauswag ang digital learning.
Apan kining mga TV unit gigamit usab atol sa Palaro pinasikad sa hangyo sa DepEd aron suportahan ang pag-host sa Dakbayan sa Sugbo sa maong kalihokan.
Gibutang kini sa mga monitoring rooms aron masundan ang mga duwa.
Matud ni Hontiveros nga ang proseso sa pagpalit “transparent, nagsubay sa balaod, ug giaprobahan sa Local School Board pinaagi sa Office of the Mayor."
“My role was purely facilitative, with no personal discretion in the purchase,” matud ni Hontiveros.
Human sa Palaro, ang mga unit gibalik sa DepEd ug gitipigan sa ilang bodega.
Gipasangil ni Hontiveros ang pagkadaot sa mga ekipo nahitabo sa " grabe ug wala damha nga baha."
Gipunting usab niya nga giangkon ni kanhi konsehal Joy Augustus Young nga ang storage area sa basement sa DepEd Cebu City Division wala pa gyud mabahai kaniadto.
Nagpahayag si Hontiveros og kasagmuyo sa "madali-dalion" nga akusasyon ni Osmeña sa kurapsyon nga wala susiha ang kamatuoran.
Dugang niya nga iyang dawaton ang bisan unsang imbestigasyon aron limpyohon ang iyang pangalan.
Samtang gitahod niya si Osmeña tungod sa kasaysayan sa ilang mga pamilya, matud ni Hontiveros nga kining "walay pagpakabana nga akusasyon subo nga nakadaot sa maong pagtahod."
Giawhag niya ang mga opisyal sa publiko nga " ibase ang ilang mga pahayag sa kamatuoran, dili sa politika."
“I have no desire to engage in a word war—that’s not who I am—but I believe it is only right to defend my name and the work I have done, as well as the efforts I continue to make even outside of public service," matud sa retiradong PBA player.
Niadtong Biyernes, Hulyo 25, gikuwestiyon ni Osmeña ang pagpalit sa 16 15-inches LED telebisyon human kini nangabasa sa baha.
Kining mga butanga gituohan nga sobra sa gigamit sa Palaro 2024.
Matud ni Young nga ang mga telebisyon gitipigan sa usa ka bodega nga kanunay mabahaan sa Barangay Labangon.
Gibalhin kini sa basement sa DepEd tungod sa kakuwang sa luna.
Ang Division Health & Nutrition Clinic nga nahimutang sa basement gibahaan usab. / EHP