Mipakatap og 38 puntos ang All-Star guard nga si Trae Young ug gipakgang sa Atlanta Hawks ang Charlotte Hornets, 125-120, sa National Basketball Association (NBA), Sabado, Oktubre 26 (PH time).
Ang Hawks nakalingkawas sa career night ni Hornets guard LaMelo Ball nga mipasulod og siyam ka three-pointers ug mitapos sa duwa nga dunay 34 puntos.
Ang 9-of-14 3-pointers ni Ball milupig sa iyang kanhi career high nga walo ka tres.
Mitabang kang Young sa pinuntosay para sa Hawks si De’Andre Hunter nga dunay 24 puntos.
Ang Hornets piang sa maong duwa kay wala ang ilang duha ka starters nga si Brandon Miller ug Mark Williams. Si Miller dunay strained left glute samtang si Williams nagpamati og strained tendon sa iyang wala nga tiil.
Samtang sa sangka didto sa West, gitusaktosak sa Golden State Warriors ang Utah Jazz, 127-86, alang sa ikaduhang sunodsunod nga daog sa season.
Si Buddy Hield mipupo og 27 puntos ug midugang ang greatest shooter of all-time nga si Stephen Curry og 20 puntos para sa Warriors, kinsa misaka sa 2-0 (win-loss) record.
First half palang daan nagdilaab na ang kamot ni Hield og miburak kini og 24 puntos gikan sa 6-of-7 shooting sa three-point line.
Wa hatagi og higayon sa Warriors nga mabalik sa tuno ang Jazz og gilubong nila kini, 68-32, sa third quarter.
Nindot unta ang sugod sa Jazz kay nakakuha kini og 15-6 nga labaw sa first quarter, apan wa kini makapukong sa atake sa Warriors sa second quarter nga maoy niusab sa pormada sa duwa.
Sa laing duwa sa West side, miburak og 35 puntos si Anthony Davis aron pangulohan ang Los Angeles Lakers batok Phoenix Suns, 123-116.
Ang Lakers nakabuhat sa unang 2-0 start sa season sukad 2010-11.
Si Kevin Durant mikamada og 30 puntos ug si Devin Booker midugang og 23 para sa pilderong Suns. / RSC