Duwa karon:
7:30 pm- Magnolia batok Phoenix
Pahugtan og suway sa Magnolia Chicken Timplados Hotshots ang ilang paggunit sa solong liderato sa ilang pagpakigbatok sa Phoenix Super LPG Fuel Masters sa out-of-town game sa Philippine Basketball Association (PBA) Season 49 Philippine Cup sa Zamboanga City.
Ang Hotshots kasamtangang nag-una sa komperensya dala ang 3-0 nga rekord samtang ang Fuel Masters adunay 1-2 nga rekord.
Ning sangkaa, mokawat og atensyon sila si Mark Barroca sa Hotshots ug RR Garcia sa Fuel Masters, kinsa parehong natawo sa Zamboanga, nga dugay na sab nga wala naka-host og duwa sa PBA.
Si Barroca lab-as pa sa iyang mabayanihong pag-agak sa Hotshots ngadto sa overtime nga daog batok sa San Miguel Beermen, 98-95, niadtong Miyerkules, Abril 16.
Sa iyang bahin, si Garcia dako sab og natampo dihang gipangmakmak sa Fuel Masters ang Meralco Bolts, 109-97, sa labing ulahi nilang duwa.
“We need this kind of game, an overtime game, a grinding game to test our character and to test kung nasaan kami ngayon at this stage of the league,” matod ni Magnolia coach Chito Victolero kabahin sa ilang makutas nga daog batok sa Beermen.
Parehong taas og morale ang Hotshots ug Fuel Masters hinungdan nga gilauman ang makapaukyab nga engkuwentro ang masaksihan sa Zamboangueños. / ESL