Naigo sa kusog nga boltahi sa Meralco Bolts ang Magnolia Chicken Timplados Hotshots, 82-74, sa Philippine Basketball Association (PBA) Governors’ Cup, Sabado sa gabii, Septiyembre 7, didto sa Panabo Multi-Purpose Tourism, Sports & Cultural Center.
Gipaig sa Bolts ang import-less Hotshots para makuha ang ikatulong sunodsunod nga daog ug isaka ang win-loss rekord ngadto sa 5-1 nga maoy best record sa Group A.
Mipakatap ang import sa Bolts nga si Allen Durham og double-double nga 15 puntos ug 15 rebounds.
Ang guard nga si Chris Newsome maoy highest scorer sa Bolts nga dunay 21 puntos ubanan sa walo ka rebounds ug tulo ka assists, samtang si Bong Quinto miabag og 16 puntos ug walo ka rebounds.
Maayo pud nga nakaduwa si Chris Banchero nga dunay 10 puntos og unom ka assists ug ang rookie nga si CJ Cansino miamot og sayis puntos.
Ang Bolts miduwa nga wala ang serbisyo sa key players nga sila Aaron Black (MCL), Allen Maliksi (bone spurs), Cliff Hodge (back), Raymond Almazan (knee) ug Norbert Torres (dengue).
Sa ilang habig, ang Hotshots wa puy import kay pakyas nga makakuha og FIBA transfer clearance ang bag-ong import nga si Shabazz Muhammad alang sa road game sa Panabo.
Ang locals nga si Zav Lucero ug Mark Barroca, ang mipuntos og 14 ug 12 alang sa Hotshots nga natagak ngadto sa 3-3 rekord.
Puntos matag-usa:
Meralco (82) - Newsome 21, Quinto 16, Durham 15, Banchero 10, Cansino 6, Bates 5, Pascual 4, Mendoza 3, Caram 2.
Magnolia (74) - Lucero 14, Barroca 12, Lee 11, Balanza 10, Sangalang 9, Abueva 7, Dionisio 7, Laput 2, Ahanmisi 2. / RSC