Nagpakita na usab si Paul Lee og talagsaong shooting gikan sa layo aron alsahon ang Magnolia Hotshots batok Northport Batang Pier, 106-97, sa Philippine Basketball Association (PBA) Philippine Cup, Mayo 24, sa Candon, Ilocus Sur.
Nakapasulod si Lee og four-point shot aron buk-on ang 85-all nga panagtabla sa Magnolia ug Northport. Gisundan pa niya og lain napud nga four-point shot ug usa ka tres aron masiguro na ang kadaogan sa Hotshots.
Tungod sa maong daog, nakuha na sa Magnolia ang unang luna sa quarterfinals og nabalik sa ilaha ang liderato sa team standings bitbit ang 7 (win-loss) record.
Nahuman ni Lee ang duwa nga adunay 16 puntos, unom ka assists, ug lima ka rebounds sa 31 minutos nga playing time.
Mitabang para sa Magnolia si Zav Lucero nga nipupo og 20 puntos ug walo ka rebounds, si Mark Barroca nga nidunol og 15 puntos, pito ka assists, ug upat ka rebounds ug si Pete Alfaro III nga niamot og og 13 puntos.
Si Jerom Lastimosa ug Aris Dionisio ang duha pa ka Hotshots nga nagtapos og double figures, nga nagkuha og 10 puntos matag-usa.
Nagtimon sa Northport mao si Wil Navarro sa iyang game-high 27 puntos ug 13 rebounds, si Sidney Onwubere nakatampo og 19 puntos, si Jio Jalalon nakakuha og 16 puntos, samtang si Josh Munzon nakadugang og 14 puntos para sa pilderong Batang Pier.
Puntos matag-usa:
Magnolia (106) - Lucero 20, Lee 16, Barroca 15, Alfaro 13, Lastimosa 10, Dionisio 10, Abueva 8, Sangalang 7, Dela Rosa 5, Eriobu 2, Mendoza 0, Escoto 0, Ahanmisi 0.
NorthPort (97) - Navarro 27, Onwubere 19, Jalalon 16, Munzon 14, Kwekuteye 9, Nelle 7, Yu 3, Flores 2, Bulanadi 0, Taha 0, Cuntapay 0. / RSC