Mobangon dayon og suway gikan sa pagkapilde ang league-leader Magnolia Chicken Timplados Hotshots sa ilang pagpakigbatok sa nagsalimoang nga NorthPort Batang Pier sa usa ka out-of-town game karong alas 7:30 sa Sabado sa gabii, Mayo 24, 2025, sa Philippine Basketball Association (PBA) Season 49 Philippine Cup sa Candon City Arena sa Candon, Ilocos Sur.
Ang Hotshots mainitong nakasugod sa komperensiya ug nisagunson kini pagdaog sa nag-una nilang unom ka mga tahas apan sa labing ulahi nilang duwa, gipakgang sila sa Rain or Shine Elasto Painters, 105-119, niadtong Dominggo, Mayo 18.
“I think we need to go back to basic, go back again to the film, watch the film, and then, sabi ko nga kanina, ‘wala naman natalo, may natuto lang.’ Natuto kami doon na it’s not easy to win,” matod ni Magnolia coach Chito Victolero nga napatik sa www.pba.ph.
Kon unsa ang ilang nakat-unan sa ilang pagkapilde batok sa Elasto Painters, labing seguro gamiton kini sa Hotshots batok sa Batang Pier.
Nagpatong man tuod ang Hotshots sa ibabaw nga bahin apan nagkinahanglan pa gihapon sila og dugang kadaugan aron makaseguro og luna sa Top 4, nga maghatag og twice-to-beat nga benepisyo sa quarter-finals.
Kon nagkinahanglan pa makadugang og daog ang Hotshots, mas nagkinahanglan ang Batang Pier gumikan kay nagbitay sila sa ilawom nga bahin dala ang 1-5 nga rekord.
Wala pa man tuod hingpit nga napupos ang paglaum sa Batang Pier apan kinahanglan na nilang molihok ning higayuna aron makasaka sa standing. / ESL