Mga duwa karon:
5:00 pm- TNT batok Blackwater
7:30 pm- Magnolia batok NLEX
Mag-ilog og puwesto sa Top 4 ang Magnolia Chicken Timplados Hotshots ug NLEX Road Warriors sa ilang panagsangka sa main game karong Biyernes sa gabii, Hunyo 6, 2025, sa Philippine Basketball Association (PBA) Season 49 Philippine Cup sa Ninoy Aquino Stadium.
Ang Hotshots ug Road Warriors kasamtangang nagbahin sa liderato nga pulos nagbitbit og 7-2 nga rekord.
Ang modaog ning sangkaa mao ang labing unang makaseguro og puwesto sa Top 4 nga maghatag og twice-to-beat nga benepisyo alang sa quarter-finals.
Human nila gipangdispatsar ang nag-una nilang pito ka mga kontra, ang Hotshots nasugamak sa kapildihan batok sa Rain or Shine Elasto Painters, 105-119, ug Barangay Ginebra Kings, 81-85.
Mao kini hinungdan nga kasamtangang nababagan ang ilang tinguha nga makasulod sa Top 4.
Ning higayuna, buhaton sa Hotshots ng tanan aron makasulod na sila sa Top 4 hilabi na kay sikit kaayo ang inilugay ning maong mga puwesto.
“We will go for it (playoffs incentive),” matod ni Magnolia coach Chito Victolero nga napatik sa www.pba.ph.
Gipasabot ni Victolero nga gilubong na nila sa limot ang ilang nasinating duha ka sunodsunod nga kapildihan ug nagtutok na sila nga makarehistro og usa ka daog sa katapusan nilang duha ka mga duwa.
Mao sab kini ang anaa sa alimpatakan sa Road Warriors.
Sa laing bahin, Grandslam-seeking TNT Tropang 5G padayon sab nga manikaysikay aron makailog og puwesto sa Top 4 sa ilang pagpakigbatok sa nagsalimoang nga Blackwater Bossing.
Ang Tropang 5G kasamtangang naa sa ikaunom nga puwesto dala ang 5-3 nga rekord apan hayaghayag pa ang ilang paglaom nga makasulod sa Top 4 kay aduna pa man sila’g nahabiling tulo ka mga duwa.
Ang Bossing nagbitay sa ilawom nga bahin dala ang 1-7 nga rekord ug usa sa teams nga wala na’y purohan nga makasulod sa quarter-finals. / ESL