Housing project sa nagpuyo sa 93-1
SunStar Local News GPX

Housing project sa nagpuyo sa 93-1

Gipakita sa Century Peak Holdings Corp. ang scale model alang sa housing project nga tukuron niini alang sa apektadong 93-1 nga mga residente.

Ang kompaniya, nga girepresentahan ni Dr. Greg Murillo, nihimo sa ilang presentasyon sa Kapitolyo niadtong Biyernes, Pebrero 2, 2024, atol sa usa ka tigom uban kang Gobernador Gwendolyn Garcia, Bise Mayor Raymond Garcia sa dakbayan sa Sugbo, ug uban pang importanteng stakeholders.

Human makita ang scale model, ang gobernador niingon nga naghinam-hinam siya sa Lot 1112 housing project, nga tukoron sa usa ka lote nga gipanag-iya sa Kapitolyo sa Barangay Apas.

Matod niya nga ang mga Sugbuanon angay nga hatagan og impresibong proyekto.

Ang Provincial Government ug Century Peak nagtinabangay sa pagpalambo sa socialized housing, nga naghatag sa apektadong 93-1 nga mga lumulupyo og mga balay nga matawag nila nga ila.

Ang proyekto maglakip sa dul-an sa 180 ka housing units, nga mahimo’ng mapanag-iya sa mga residente pinaagi sa housing loan program nga gitanyag sa Pag-Ibig.

Ang Kagamhanan sa Probinsiya nigamit og susamang proseso sa ubang apektadong indibidwal nga nagpuyo sa yuta nga gihuptan sa Kapitolyo, busa dili na bag-o ang plano sa pagbayad sa housing loan.

Agi’g tubag sa pangutana, gidayeg ni Bise Mayor Garcia ang proyekto ug gihulagway kini niya nga “beautiful and well-planned.”

Ang bise mayor niingon nga mahimo’ng ehemplo kini sa tibuok nasod, di lang sa Sugbo, ug gidayeg niya si Gobernador Garcia sa pagsuporta sa maong programa.

Related Stories

No stories found.
SunStar Publishing Inc.
www.sunstar.com.ph