Kon usa ka ka-OFW o kining overseas Filipino worker o bisan usa lang ka breadwinner nga nanarbaho dinhi sa atoa, maka-relate gyud ka sa bag-ong salida ni Zanjoe Marudo nga "How To Get Away From My Toxic Family."
Showing na kini karon sa mga sinehan ug kabahin kini sa usa ka OFW nga si Arsenio, usa ka chef sa Dubai, nga surpresang niuli sa Pinas tungod kay dili na siya ganahan manarbaho sa laing nasod ug magnegosyo na lang.
Apan sa iyahang pag-uli, dinhi na siya gisukmatan sa reyalidad kabahin sa dakong problema nga giatubang sa iyang pamilya.
Gawas niini, ang laing reyalidad sa matag pamilyang Pinoy nga nagsalig lamang sa OFW nila nga miyembro sa pamilya sa inadlaw-adlaw nila nga kinabuhi.
Niadtong Sabado, Agusto 9, 2025, usa ang Superbalita Cebu sa dinapit sa special block screening sa maong salida diin nilugwa ang executive producer ug talent manager nga si Ogie Diaz.
Matod ni Ogie nga mao kini ang labing unang salida niya nga gigastuhan gyud og maayo. Makita sab kini sa casts sa maong salida gikan ni Zanjoe, ngadto ni Susan Africa, Richard Quan, Nonie Buencamino, ug uban pa.
Dili mapugngan sa mga nanan-aw ang ilang direkta nga reaksiyon sa mga linayahan ug sa mga eksena sa maong salida.
Dinhi nimo makita kon unsa ka toxic ang usa ka pamilya nga dala na sab sa kultura sa pamilyang Pilipino.
"Itong estorya ho na ito, concept ko ho ito na pinagsamasama 'yung kwento ng mga OFW friends ko. Dahil isa lang naman talaga ang hinagpis nila, 'Bakit ako. Bakit ako lagi, wala na bang iba?"' so yun ang pinaka-gist nung kwento," matod ni Ogie.
Gibutyag sab niini nga bisan siya usa ka breadwinner sa duha ka pamilya, ang iyang kaugalingon nga pamilya diin anaa siyay lima ka mga anak nga babaye lakip na ang iyang asawa ug ang iyang pamilya uban iyang mga inahan, igsuon, ug mga pag-umangkon.
"Hindi naman kailangan na galing ka ng ibang bansa para maging tagapagtaguyod ng pamilya. Kahit dito ka sa Manila o sa probinsiya kung ikaw talaga inaasahan ng pamilya talagang wala kang choice kung 'di suportahan ang pamilya mo."
Pagbutyag pa ni Ogie nga si Zanjoe ra gyud ang iyahang nahunahunaan nga maayong modala sa role sa bida ug gani andam siya nga dili ipadayon ang salida kon wala pa kini dawata ni Zanjoe.
Giangkon sab ni Ogie nga dili sayon ang mag-produce og salida karon panahona, hilabi na nga aduna nay streaming platforms nga affordable na lang.
Gani gibutyag niini nga 2 lang sa 10 ka Pinoy films ang mokita tungod sa nagkaubos nga motan-aw niini sa sinehan.
Hinuon, tungod kay maka-relate ang OFW sa iyang latest movie, nagkadaiyang international screenings ang gihimo nila karon lakip na sa US ug Europe.
Dihang gipangutana sa mga tigbalita sa Sugbo kon nganong ingon niadto ang ending sa salida, tubag niini: "Actually sinadya namin na ganun, para paglabas ng mga tao sa sinehan, nagdi-discuss pa rin sila."
Tambag niini sa adunay toxic nga pamilya,"Kung ganun ka toxic yung family ninyo, umalis kayo," sey ni Ogie. / HBL