Tungod sa kamandoan ni Presidente Ferdinand Marcos Jr. batok sa ilegal nga paggamit sa nagkalain-laing accessories sa sakyanan, ang Philippine National Police (PNP) Highway Patrol Group (HPG) nakasakmit og daghang blinkers ug siren atol sa usa ka buwan nga gipakusgan nga operasyon.
Gikan sa Marso 25 hangtod Abril 22, si PNP-HPG director Brigadier General Alan Nazarro, niingon nga adunay kinatibuk-ang 1,707 ka mga illegal vehicle accessories, lakip ang 957 ka led lamps, 300 ka blinkers, 179 ka fog lights, 134 ka modified mufflers, 78 ka horns, 48 ka strobe lights ug 11 ka siren nga naila nga “wang-wang” nasakmit atol sa nagkalainlaing operasyon sa tibuok nasod.
Sa sayo pa, nipagawas si Marcos og Administrative Order (AO) 18, nga nagdili sa dili husto ug ilegal nga paggamit sa mga siren, blinker ug susamang mga gamit gawas sa mga sakyanan sa PNP ug Armed Forces of the Philippine, fire trucks ug uban pang emergency vehicles sama sa ambulansya.
Iyang namatikdan ang pagdaghan sa maong accessories sa sakyanan, hinungdan sa pagkabalda sa trapiko ug dili luwas nga dalan ug traffic environment.
Ang AO 18 susama sa Presidential Decree 96, nga gi-issue ni kanhi Presidente Ferdinand Marcos niadtong 1973.
Ubos sa PD 96, ang mga first-time offender dili mag-atubang og bisan unsang silot apan kinahanglang mobayad og multa nga mokabat sa P600, samtang ang blinker o siren nga gitaod sa ilang mga sakyanan kuhaon.
Ang mga makalapas pasakaan og kaso’ng kalapasan sa PD 96 atol lamang sa ikaduhang kalapasan, nga mahimo’ng moresulta sa pagkapriso nila nga dili molapas sa unom ka buwan.