
NANGANDAM na ang Human Resources and Development Office (HRDO) sa Cebu City Hall alang sa pagbag-o sa mga kontrata sa mga kaswal nga kawani ubos sa umaabot nga administrasyon ni Mayor-elect Nestor Archival.
Apan ang katapusang desisyon magdepende ni Archival og sa pinansyal nga kapasidad sa kagamhanan sa dakbayan.
Gikumpirmar ni HRDO head Henry Tomalabcad niadtong Lunes, Hunyo 16, 2025, nga ang iyang opisina nagproseso na sa gikinahanglang mga dokumento, lakip na ang pag-imprinta sa mga appointment.
"Ang HR, nag-prepare nalang gyud daan. Nag-assume mi nga all casuals kay mao man pronouncement niya before nga (magpabilin ang mga kaswal kon tugotan sa budget). Ang iya kunong condition is the financial capacity,” pasabot ni Tomalabcad.
Matod ni Tomalabcad nga ang kagamhanan nakahatag na og budget alang sa mga kaswal nga kawani alang sa tibuok tuig, usa ka hinungdan nga makasuporta sa ilang pagpabilin.
Apan, ang susama nga pagpangandam wala pay labot sa mga job order (JO) nga kawani. Giklaro niya nga wala pa gilakip sa HRDO ang mga JO alang sa pag-renew sa ilang kontrata.
Gibutyag sab ni Tomalabcad nga nakigkita siya kang Archival ug sa iyang transition team kausa, apan walay piho nga mga hangyo ang gihatag sa HRDO mahitungod sa mga butang nga may kalabutan sa personnel.
Samtang ang HRDO nakahatag na sa gidaghanon sa mga regular, kaswal, ug job order nga kawani ngadto sa transition team.
Apan dili makahatag si Tomalabcad sa eksaktong numero sa kasamtangan tungod kay ang uban niretiro na.
Nidugang siya nga ang istruktura sa organisasyon sa matag departamento ug ang gidaghanon sa mga JO nga kawani nahatag na usab.
Sa dili pa mohulip ang bag-ong administrasyon, gipaabot ni Tomalabcad nga ang mga opisina nga direktang konektado sa Opisina sa Mayor ang labing maapektuhan, sanglit ang mga piniling opisyal kasagarang magdala sa ilang kaugalingong staff.
Ang mga personahe sa mga konsehal sa siyudad maapektuhan usab sa pagbag-o sa lide-rato.
Niadtong Mayo 26, 2025, si outgoing Mayor Raymond Alvin Garcia naghatag og breakdown sa workforce sa City Hall: 1,582 ka regular nga empleyado, 2,962 ka kaswal nga empleyado, 2,668 ka job order nga personahe, ug 187 ka coterminous staff.
Ang kapalaran sa 2,962 ka kaswal ug 2,668 ka job order nga empleyado karon nag-agad sa pinansyal nga pagrepaso ug katapusang desisyon sa umaabot nga administrasyon ni Archival. / JPS