Usa ka lalaki gidakop ug gipriso sa kapulisan sa dakbayan sa Naga human nag-wild sa kahubog sud sa videokihan sa Purok Onion 2, Barangay South Poblacion, siyudad sa Naga, alas 12 sa tungang gabii, Huwebes, Abril 11, 2024.
Ang suspek giila nga si Jembo Korniado Aguilar, 22, ulitawo, taga Purok Sili 2, Barangay South Poblacion. Siya girekamo sa tag-iya sa Lorn Idin Sari-Sari Store & KTV tungod sa pagpamuak sa screen sa TV hinungdan sa kahadlok usab sa ubang mga kustomer.
Ang tag-iya nga si Lorna Labora Debheijer, 69, minyo, maoy nanawag sa kapulisan aron pagpadakop sa ilang kustomer nga nag-wild sa kahubog.
Niresponde dayon ang kapulisan ubos sa kamanduan sa ilang hepe nga si P/Lt. Col. William Ceda Homoc hinungdan nga nasikop ang suspek.
Sumala sa imbestigasyon, ang suspek nakatulog sa kahubog apan nakamata ug kalit nga gisumbag ang TV sa videoke machine nga way igong katarungan.
Wa masayri kon nganong siya nag-wild og kalit.
Ang suspek nga gikahinabi sa Superbalita Cebu niangkon nga siya hubog apan wa siya niangkon sa pasangil nga iyang gisumbag ang TV ug nabuak. /
DVG