Gisikop ug gibalhog sa bilanggoan sa kapulisan sa Siyudad sa Naga ang 43 anyos nga lalaki nga nagmaoy sa kahubog ug gireklamo nga nangulata ug nanuok sa Purok Mankikis, Brgy. Tangke, alas 7:30 sa gabii, Dominggo, Agusto 25, 2024.
Ang kapulisan sa Naga ubos sa kamandoan ni P/Lt. Col. William Homoc nitubag sa alarma sa kagubot sa dapit ug nasikop ang suspek nga giila lang sa ngalan nga si 'Joseph', kinsa gireklamo sa biktima nga si 'Keith,' 19.
Sumala sa personnel sa Naga City Disaster Risck Reduciton Management Office, dunay nanawag sa kapulisan sa Naga ug nagpahíbalo sa maong ka gubot.
Dihang girespondihan sa kapulisan, naabtan pa sa mga polis ang suspek nga nituok ug nikulata sa biktima nga niresulta sa pagkaangol niini.
Sa imbestigasyon sa kapulisan, nasayran nga ang biktima naglakaw padulong sa usa ka tindahan sa maong dapit kay dunay paliton apan sa kalit lang nga gibabagan sa suspek nga gituhoang hubog nga masuk-anon. / DVG