Hubog ‘mibabag’ sa raid sa tigbakay, gisikop

File photo
File photo

Napulo ra ang nasikop sa kapulisan sa mga sugarol sa duha ka mga tigbakayan nga ilang gironda sa Miyerkules sa hapon, Nobiyembre 1, 2023.

Kay sa usa sa mga gironda nga tigbakayan, nibabag ang usa ka hubog nga dunay “amigo’ng major.”

Ang mga polis sa Liloan Police Station unang ningronda mga alas 1:30 sa hapon sa Miyerkulis sa Purok Kamino, Brgy. San Vicente, lungsod sa Liloan.

Nasikop sila si Jimmy Survilla, Allan Fulguerinas, ug Enriquez Garcia.

Nakuha sa kapulisan gikan possession sa mga dinakpan ang usa ka manok nga bihag, usa ka buwang ug P300 nga gituohan nga pusta.

Pagka-alas 2:30 sa hapon sa Sitio Sambag, Brgy. San Vicente, gironda nasab sa kapulisan ang laing tigbakayan human sila nakadawat og tawag sa telepono.

Usa ka Fritz Bongo, gidemalas kay na trap, wala nakadagan busa napusasan.

Nakuha sa iyang possession ang usa ka manok bihag, usa ka buwang, P200 nga pusta.

Si Major Eric Gingoyon, hepe sa Liloan Police Station nga nahinabi sa Superbalita Cebu nagkanayon nga alas 4:05 sa hapon sa Miyerkulis, sila nakadawat og tawag nga dunay tigbakay sa Purok Avocado, Sitio Ylaya, Brgy. Cotcot.

Nasikop nila sa pagpangronda ang lima ka mga sugarol nga giila nga sila si Marvin Rosal Jubay, Armando Masibay Masuangat, Efren Rey Rica Jubay, Kevin Amion Cabatingan, Jelon Gonzaga Donaire.

Narekuber ang usa ka bihag nga manok, usa ka buwang ug P400 nga pusta.

Apan usa ka hubog, nga giila nga si Sundell Niño Luchavez gipusasan kay nibabag sa kapulisan.

Matod ni Gingoyon nga nanghilabot si Luchavez sa pagpanakop sa mga personnel sa Liloan Police Station.

“Ngano man ning dakupon nga naa daw siya kaila nga major sa Siyudad,” asoy ni Gingoyon sa Superbalita Cebu sa Huwebes, Nobiyembre 2.

Matod sa hepe nga tungod sa pagbabag niini, ubay-ubay sa mga sugarol ang nakadagan, lima ra ang ilang nasikop.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph