Hubog nanunggab, nasikop sa ginukdanay

BIKTIMA: Kini ang biktima sud sa usa ka tambalan human gidunggab sa usa ka hubog sa Brgy. Tinubdan, lungsod sa San Fernando, alas 10:00 sa gabii, Sabado, Disyembre 9, 2023./ Tampo
BIKTIMA: Kini ang biktima sud sa usa ka tambalan human gidunggab sa usa ka hubog sa Brgy. Tinubdan, lungsod sa San Fernando, alas 10:00 sa gabii, Sabado, Disyembre 9, 2023./ Tampo

Nagmaoy sa kahubog, nanunggab sa way igong hinungdan sa lalaki nga naglakaw sa Barangay Tinubdan, lungsod sa San Fernando, alas 10:00 sa gabii, Sabado, Disyembre 9, 2023.

Sumala sa tinubdan sa Superbalita Cebu, ang biktima giila nga si Jan Vincent Pacquiao, 29, ulitawo ug molupyo sa naasoy nga dapit, nadunggaban sa iyang bukobuko ug nalandig sa ospital.

Samtang, ang suspek nga si Renante Loguiber, 43, ulitawo ug molupyo sa samang dapit, nisibat apan nadakpan sa hot pursuit sa kapulisan sa San Fernando ubos sa kamandoan sa ilang hepe nga si Police Maj. Mark Anthony Villanueva.

Sa imbestigasyon sa kapulisan, nasuta nga si Pacquiao naglakaw pauli sa ilang balay ug ang suspek nga nagmaoy sa kahubog kalit niataki niini.

Dugang sa kapulisan, alas 7:00 sa buntag, Dominggo, Disyembre 10, 2023, dunay nakatudlo sa kapulisan nga ang suspek naa nagtago sud sa usa ka parking area sa usa ka pabrika sa semento sa Brgy. South Poblacion, San Fernando.

Dihang giadto sa kapulisan, nahitabo ang ginukdanay ug ang suspek nikatkat sa taas nga koral ug nilayat aron pag-ikyas apan napiang kini hinungdan nga wa na maka­dagan ug nasikop sa kapulisan.

Ang suspek mao na usab ang gidala sa ospital sa mga sakop sa San Fernando Di­saster Risk Reduction and Management Office.

Human gipatambalan ang suspek, gibalhog dayon kini sa prisohan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph