Usa ka construction worker nga hubog, napalgang patay na sa Barangay Kampingganon, lungsod sa Bantayan, alas 8:50 sa buntag, Dominggo, Nobiyembre 26, 2023.
Si Joseph Desucatan, 47, ulitawo, ug taga NHA sa Barangay Kampingganon, napalgan sa iyang mga silingan.
Ang kapulisan sa Bantayan nakadawat og impormasyon gikan sa concerned citizen bahin sa usa ka tawo nga napalgang walay kinabuhi.
Ang patayng lawas naa sa gawas sa usa ka tindahan sa nahisgutang lugar.
Sa imbestigasyon sa kapulisan nasuta nga Sabado pa sa gabii nag-inom ang biktima uban sa mga higala.
Nakugang na lang sayo sa buntag ang tag-iya sa tindahan nga si Valentin Caraballe Jr. nga iyang gipukaw ang biktima nga naglingkod nga sama sa natulog.
Wala na kini maglihok hinungdan nga nangayo siyag assistance sa kapulisan.
Si Carlo Dale Pacaña, duty nurse sa Municipal Disaster Risk Reduction and Management Offce (MDRRMO) sa Bantayan, nagkanayon nga ang biktima giataki sa sakit sa kasingkasing.
Walay nakita nga timailhan ang kapulisan nga dunay foul play sa hitabo.