[UPDATED WITH CORRECTIONS] NAGISI ang dila sa usa ka 35 anyos nga ulitawo human nga nibangga ang iyang sakyanan sa gutter sa flyover sa Barangay Banilad, Dakbayan sa Sugbo alas 5:00 pasado sa buntag, Septiyembre 13, 2025.
Ang drayber nagpuyo sa Cadahu-an, Barangay Talamban, Cebu City.
Ang Cebu City Transportation Office (CCTO) nakadawat og report nga dunay nabangga nga sakyanan sa nahisgutang dapit hinungdan nga ila kining gisusi.
Gikataho nga nakainom ang drayber ug gituohang nakatagpilaw nga padung na mouli sa Barangay Talamban.
Tungod sa kakusog sa pagbangga, napaakan sa biktima ang iyang dila, hinungdan nga nagisi kini.
Ang drayber gidala sa tambalanan. Matud sa biktima pinaagi sa email sa SunStar Cebu nga wala ra siya nakaangkon og bun-og sa lawas ug wala ray uban problema, base sa resulta sa X-ray test. (JDG)