NAGPAHUWAS sa iyang kahubog ang usa ka 31-anyos nga lalaki sulod sa bilanggoan human kini giingon’g nagmaoy sa Sitio Barba, Barangay Duljo-Fatima, Dakbayan sa Sugbo sa alas 10 pasado sa gabii, Dominggo, Hunyo 29, 2025.
Ang suspek nailhan nga si alyas Ronel, walay trabaho ug nagpuyo sa Barangay Tisa, Dakbayan sa Sugbo.
Una pa niini, nakadawat ang Mambaling Police Station og tawag gikan sa usa ka residente sa maong dapit nga nangayo og tabang tungod kay nag-wild ang maong suspek.
Matod pa nga nagsige og syagit syagit ang maong suspek ug nangita og away sa mga lumolupyo sa lugar.
Nasayran nga sa dihang gisuwayan siya pagpakalma sa mga kapulisan nga niresponde, nisukol kini og nanukmod ug nibuhi pa og mga malaw-ay nga pulong.
Giabalhog na sa Mambaling Police Station ang suspek ug posible nga pasakaan og kasong alarm and scandal, resisting arrest ug physical injury. / JDG