Nagpahuwas sa kahubog ang usa ka 23-anyos nga lalaki sulod sa selda human kini gidakop kay nagmaoy ug nanglabay og botelya sa niagi nga multicab sa may dalan C. Padilla, Barangay Mambaling sa Dakbayan sa Sugbo sa alas 6 pasado sa Biyernes sa buntag, Abril 25, 2025.
Ang dinakpan nailhan nga si alyas Winly, taga C. Padilla St. sa habig sa Barangay Duljo Fatima.
Gidakop ang suspek human nakadawat og tawag ang Mambaling Police Station mahitungod sa pagmaoy sa suspek nga nakamugna og trapiko sa kadalanan.
Gikataho nga nasuko ang suspek dihang naglisud og labang sa pedestrian lane kay naatlan sa daghan’g nangagi nga mga sakyanan.
Tungod sa kahubog, nanglabay kini og botelya diin naigo ang windshield sa multicab. Maayo na lang gani kay wala ra kini nilapos ug wala ra naangol ang drayber.
Nasayran usab nga misuway pa kinig labay sa uban pang mga sakyanan apan dali kining gidakop sa mga miresponde’ng kapulisan.
Ang danyos sa multicab gibanabana nga moabot sa P5 mil.
Gibalhog na ang suspek sa Mambaling Police Station ug mag-atubang kini og kasong malicious mischief. / JDG