Gibalhog sa Tuburan Police Station ang polis nga sakop sa Cebu City Police Office (CCPO) human niya gipusil-patay ang iyang silingan sa Barangay 6, Lungsod sa Tuburan, pasado alas 6 sa buntag, Biyernes, Hunyo 13, 2025.
Ang suspek giila nga si Police Staff Sergeant Florante Perucho Hoyle kinsa nadestino sa City Investigation and Detective Management Unit sa CCPO.
Matod ni Police Captain Dun Blane Tabares, ang information officer sa Cebu Police Provincial Office, nga kalit lang nga naabot ang maong suspek sa dapit nga gituohang hubog ug nakig-estorya sa grupo sa mga batan-on nga nag-inom.
Apan pipila ka gutlo ang nakalabay, nitumaw ang ilang panaglalis ug kalit lang nga gisagpa ni Hoyle ang usa ka lalaki nga giila nga si Leonel Angelio Flores nga naigo sa iyang walang aping.
Gumikan niini nahitabo ang lamuk-lamok ug gikuha sa suspek ang iyang armas sa iyang hawak ug iya matod pa kining gipasalba tumong sa yuta nga niresulta sa pagdinaganay sa lainlaing direksyon sa mga lalaki.
Apan nisulod ang suspek sa balay sa biktima ug dayong pusil tumong sa ulo niini ga-mit ang iyang armas.
“Sigon sa investigator sa Tuburan nga murag mista-ken identity ang biktima kay nagtuo ning suspect nga apil siya sa crowd nga iyang nakaaway sa tapuk-tapok,” matod ni Tabares.
Hinuon, ni-surrender ra sab dayon ang suspek human sa hitabo ug narekober sa kapulisan ang armas nga Colt 45 nga iyang gigamit sa pagpusil-patay sa biktima nga si Leo Vergel Fin Suico.
Sa dihang nakasakay na sa patrol car sa Tuburan Police Station ang suspek, gilabay kini og dakong bato sa igsuon ni Suico apan ang bildo sa luyo sa patrol car maoy naigo ug nabuak.
Tungod sa iyang gihimo, giapil siya sa pagdakop sa mga pols tungod sa kasong Malicious Mischief ug gidala sa police station.
Gikuhaan na sa iyang tsapa si Staff Sergeant Hoyle kinsa mag-atubang og kasong kriminal ug administratiba ug posible pang mataktak sa trabaho. / AYB