Nalukop og klaseklaseng hungihong ug kahinam ang Pridi Banomyong International College (PBIC) sa Thammasat University sa Bangkok, Thailand, atol sa pag-host sa ikatulong PBIC Thai Studies International Conference niadtong Hunyo 15, 2025, nga may tema: “GHOSTS—Thailand’s Haunted Histories and Mediascapes.”
Usa ka papel nga may titulong “Katingaláhan” ang nag-inusarang representasyon gikan sa Dakbayan sa Sugbo ug sa Pilipinas nga nipasundayag sa maong prestihiyusong kumperensiya.
Kapin sa 200 ka partisipante gikan sa lokal ug internasyonal nga mga institusyon ang nitambong sa maong tibuok-adlaw nga kalihukan diin kapin sa 20 ka panukiduki nga papel ang gipresentar.
Ang maong mga papel nisusi sa papel sa mga kalag sa literatura, media, katilingban, ug sa kontemporaryong pagteyoriya.
Sa plenary session, tulo ka inilang eksperto ang nipasiugda sa ilang panukiduki.
Si Rachel Harrison sa SOAS University of London nipresentar sa iyang papel nga “Ghostly Bodies that Matter: The Role of Phi in Theorising Thai Cultural Studies.”
Si Peter A. Jackson sa Australian National University nituki sa tema nga “Ghost (phi) or Deity (ong-thep)? Exorcise (lai phi) or Worship (bucha)?” nga nitan-aw sa kalabutan sa modernidad, klase, ug espirituwal nga panabot sa Thailand.
Samtang si Thongchai Winichakul sa University of Wisconsin-Madison ug PBIC Thammasat University nipresentar sa “Landscapes of Ghosts in Thailand and Thai Studies with Focus on Two Ghosts of History.”
Upat sab ka breakout panel sessions ang gipahigayon nga nakasentro sa mga tema sama saMga Kalag sa Medya (Ghosts in Media), Mga Kalag sa Literatura (Ghost in Literature), Mga Kalag sa Katilingban (Ghosts in Society), Pagteyoriya sa Mga Kalag sa Modernong Panahon (Theorizing Ghosts in the Modern Age).
Gihatagan og dakong bili ang interdisiplinaryong pagtan-aw sa mga kalag, ilabi na ang koneksyon niini sa kasaysayan ug kontemporaryong kultura sa Thailand.
Ang PBIC sa Thammasat University nailhan isip usa sa mga labing prominente nga institusyon sa Thailand, dili lang tungod sa akademikong kalidad niini kondili tungod sab sa lawom nga kasaysayan ug tradisyon nga gilangkuban.
Sa miaging duha ka tuig, ang mga tema sa PBIC Thai Studies International Conference nakasentro sa Kultura sa Anting-anting niadtong 2023 ug Tradisyon sa Jakarta sa tuig 2024.
Ang partisipasyon sa Sugboanon nga papel sa maong internayonal nga kumperensiya nagpamatuod sa aktibong kontribusyon sa mga Filipino sa interkultural nga panukiduki ug sa padayong pagpalalom sa pagsabot sa kasaysayan ug kultura sa Southeast Asia. / PR /Tea Solon