Nakig-ayon ang Police Regional Office (PRO) 7 sa ubang ahensya sa gobiyerno alang sa seguridad sa langyaw ug lokal nga mga turista nga mobisita sa nagkalainlaing dapit sa Central Visayas (CV) ning summer.
Gipaaktibo og balik sa PRO 7 ang ‘Ligtas Sumvac 2024’ campaign sugod sa Abril 1 ngadto sa Mayo 31 aron pagseguro nga malinawon ang bakasyon sa summer.
Sa kasinatian, matag panahon sa bakasyon sa Pilipinas naila na nga modagsa ang daghang tawo sa usa ka dapit ug ang uban mamauli sa ilang tagsa-tagsa ka probinsya aron mosaulog sa mga kalingawan sama sa piyesta ug uban pa.
Ang pagdasok sa daghang tawo makamugna kini’g hulga sa seguridad gikan sa nga kriminal nga dunay tinguha nga mohimog krimen.
Tungod niini, si Police Brigadier General Anthony Aberin, hepe sa PRO 7, mipaniguro nga luwas ang mga bisita ug ang publiko ning panahon sa bakasyon.
Gibutyag sa heneral nga ilang palambuon ang ilang police visibility aron mohatag og seguridad sa publikong mga lugar ug mga dapit nga dunay daghang tawo nga nagtapok.
“Our top priority is to prevent crime incidents in the communities and we are intensifying the deployment of our PNP personnel to provide maximum security coverage and public safety assistance in key places of convergence such as transport terminals and tourist sites,” matod ni Aberin.
Gipahibawo sa heneral nga wala silay nabantayan nga hulga sa seguridad sa tibuok Central Visayas ug wala usab sila makadawat og bisan unsa nga matang sa hulga.
Ilang gipanglantawan nga malinawon ug luwas ang summer vacation sa rehiyon 7 kini base sa bag-ong assessment sa Regional Intelligence Committee.
Bisan pa man niini, wala mokompiyansa ang kapulisan ug mopadayon sa pagpahugot sa seguridad pinaagi sa pagpatuman sa anti-criminality campaign.
“We are ready to secure the region with all security plans in place and ready for implementation,” dugang ni Aberin.
Ang maong security template susama usab kini sa ipatuman nga seguridad atol sa pagtimaan sa Semana Santa nga nagsugod karon, Marso 25, hangtod sa Marso 31, 2024 nga nagtutok sa mga relihiyusong kalihukan sa simbahang Romano Katoliko. / AYB