HVI ‘drug pusher,’ sikop
Wa na kaipsot ang gikataho nga high value individual (HVI), Tiyson Rizada Quijano human nakuwelyohan sa mga sakop sa Talisay City Police Station sa gihimo nga buy-bust operation sa Sityo San Rafael, Barangay Tangke, Talisay City, Pebrero 23, 2024.
Si Quijano, alyas Junior, 30, may kapuyo ug taga Mahayahay 2, Brgy. Pasil sa siyudad sa Sugbo, nakuhaan og gituohang shabu nga gibanabana nga motimbang ngadto sa 25 gramos nga adunay standard drug price P170,000.
Nasayran nga ang suspek base sa validation sa kapulisan nga giingong mamaligya kini og shabu sa maong lugar.
Mihimo og operasyon ang kapulisan sa Talisay City nga gipangulohan ni PLt.Col. Wayne Magbanua inabagan sa Philippine National Police Drug Enforcement Group Special Operation Unit 7 ug koordinasyon sa Philippine Drug Enforcement Agency (PDEG-SOU) 7.
Gipalitan sa usa ka nagpaka- aron ingnon nga buyer si Quijano gamit ang bogus money nga gipatuo nga mokabat sa P15,000, bugti sa usa ka putos nga shabu. / DVG