Nagtingkagol sa bilanggoan sa Talisay City Police Station ang suspetsadong durugista nga taga Brgy. Ermita, Cebu City human nadakpan sa buy-bust sa mga sakop sa Talisay City Drug Enforcement Unit Intelligence Police ubos sa kamandoan sa ilang hepe nga si P/Lt. Col. Epream Paguyod.
Nasikop sa operasyon ubos sa koordinasyon sa Philippine Drug Enforcement Agency (PDEA 7) giilang si Sherwin Beldad Cañete, 36, ulitawo, may kapuyo. Cañete giila nga high value individual (HVI) sa kapulisan.
Ang suspek, sa dihang na-validate nga namaligya og shabu sa Talisay, gilusad dayon ang buy-bust alas 11:30 sa gabii, Huwebes, Abril 25, 2024, sa Purok Kamunggay, Brgy. Candulawan. Ang undercover police nigamit og P10,000 nga fake money nga gipaibabwan og P500 alang sa pagpalit og usa ka putos nga shabu.
Sa dihang natigayon na, ang suspek nakuhaan pa og dugang siyam ka putos sa gituohang shabu nga motimbang og 50 gramos nga may standard drug price nga P140,000. / DVG