Laing high value individual ang nasikop sa mga sakop sa kapulisan sa Panglao atol sa gilusad nga buy bust operation sa Purok 5, Barangay Libaong sa maong lungsod ala 1:07 sa Martes sa kaadlawon, Pebrero 27, 2024.
Ang suspek gialyasan lang sa kapulisan og Jr., 41, nagpuyo sa Barangay Sagnap, Loay, Bohol nga nakuhaan og 1,050 gramos nga gituohang shabu nga dunay standard drug price nga P7,140,000.
Nangulo sa maong operation ang hepe sa Panglao Police Station nga si Police Captain John Khalev Diel Sanchez sa pakig-alayon sa Philippine Drug Enforcement Agency-Bohol.
Matod ni Sanchez nga na monitor nila ang ilegal nga kalihukan ni Alyas Jr. human dunay nihatag nila og impormasyon gikan sa kasaligang tinubdan nga tungod ani ila dayon nga gilusad ang buy-bust.
Si Police Lt. Colonel Norman Nuez, information officer sa Bohol Police Provincial Office (BPPO) nga ila pa nga gisubay kon asa ang tinubdan sa ilegal nga drugas nga nakuha sa Bohol.
Una na nga nigawas ang impormasyon nga gikan sa Leyte ang supply sa ilegal nga drugas sanglit ang contact sa mga suspek nabilanggo man sa Aboyog Penal Farm. / AYB