Nabalhug sa Waterfront Police Station 3 ang giila nga high value individual human masikop sa gilusad nga buy-bust alas 11:55 sa gabii, Biyernes, Hulyo 4, 2025 sa Back Blessed, Barangay Tejero, Dakbayan sa Sugbo.
Ang nasikop giila nga si Rolly Ando Frasco, alyas Daloydoy, 44, construction worker nga taga Sitio Malinao, Brgy. Carreta.
Nakuha gikan kaniya ang mga pinakete sa gituohang shabu nga motimbang og 50.15 gramos nga dunay standard drug price nga P341,020.
Ang mga sakop sa Station Drug Enforcement Team sa pagpangulo ni Police Lieutenant Norvn Noceda nakadawat sa impormasyon sa ilegal nga negosyo sa suspek.
Gipaubos sa monitoring ang suspek ug human makuha ang impormasyon nihimo ug test buy ang mga operatiba.
Sa dihang nakumpirmar nga si alyas Daloydoy ang mohatag sa ilegal nga drugas sa mopalit, ila dayon nga gihimo ang buy-bust nga nisangpot sa pagkasikop.
Dunay mga impormasyon nga gihatag ang suspek kung asa siya mag kuhaan sa iyang supply sa ilegal nga drugas .
Kalapasan sa Section 5 ug 11, Article II, Republic Act 9165 ang ipasaka nga kaso batok sa suspek samtang ang nakuha nga ebidensya giduso na kini sa PNP Forensic Unit 7 alang sa himuon nga chemical analysis. / AYB