HVI sa Panglao sikop

HVI sa Panglao sikop
Tampo

GIILA nga high-value individual sa lungsod sa Panglao, probinsya sa Bohol ang nadakpan sa gilusad nga buy-bust operation sa alas 11:59 sa Huwebes sa gabii, Hunyo 20, 2024 sa Purok 4, Barangay Looc nga nakuhaan og binulto sa gituohang shabu nga motimbang sa 150 gramos.

Ang suspetsado mao si Alyas Onyot, 20, taga Barangay Mansasa, Dakbayan sa Tagbilaran, lalawigan sa Bohol.

Ang mga sakop sa Panglao Municipal Police Station sa pagpangulo sa hepe niini nga si Police Major John Khalev Diel Sanchez milusad sa buy-bust operation nga miresulta sa pagkasikop ni Onyot.

Nasakmit kaniya ang nag balor nga P1 milyion nga illegal nga drugas lakip na ang usa ka cellphone ug usa ka Yamaha Mio nga motorsiklo nga maoy gigamit sa pag hatod sa supply sa illegal nga drugas.

Kasamtangan nga gikustodiya sa Panglao Municipal Police Station ang suspetsado ug gipaubos na sa imbestigasyon kung kinsa ang iyang mga konsabo sa pagpayuhot sa illegal nga drugas.

Subay niini si Police Brigadier General Anthony Aberin hepe sa Police Regional Office-Central Visayas, midayeg sa mga personnel niini sa Panglao police station tungod sa padayon nga kampanya batok sa illegal nga drugas.

“The success of the drug bust operation is a result of our intelligence-based operations aimed at effectively combatting all forms of criminality in the region,” matod ni Aberin.

Gipasalamatan usab sa heneral ang publiko nga mitabang sa pag sumpo sa problema sa illegal nga drugas sa ilang lugar pinaagi sa pag taho sa kapulisan sa mga nalambigit niini.

Matod ni Aberin nga kung wala ang abag sa komunidad buta ang kapulisan sa pag pangita sa mga nagpayuhot sa illegal nga drugas. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph