Lalaki nga nabutang sa target list ug giila nga high value individual ang nadakpan sa gilusad nga buy-bust sa mga sakop sa Carbon Police Station 5, alas 12:15 sa kaadlawon, Miyerkules, Agusto 28, 2024, sa Sitio Bato, Barangay Ermita, dakbayan sa Sugbo.
Ang nadakpan giila nga si Reydones Cabinte Duran alyas Ewed, 45, nga residente sa Sitio Ermita Proper, Barangay Ermita, siyudad sa Sugbo.
Nakuha sa mga operatiba sa Station Drug Enforcement Unit sa Carbon Police Station sa pagpangulo ni Police Lieutenant Milo Bonjoc ubos sa kamandoan ni Police Major Philip John Libres ang 13 ka pakete sa gituohang shabu nga motimbang sa 25 gramos nga dunay standard drug price nga P170,000.00.
Ang maong mga ebidensya gi-turnover kini sa PNP Cebu City Forensic Unit alang sa chemical analysis.
Matod ni Libres nga dugay na nila nga gi-monitor ang suspek human migawas ang iyang pangalan sa nanglabay nga mga dakop.
Makapila na sila ka higayon nga modakop niini apan dali kini nga makabantay nga pulis ang ni-transact kaniya.
Ning maong operasyon, ilang gisuwayan sa pag-transact ug nagpaila sila nga buyer ug nisanong kini.
Dali nila gilusad ang buy-bust human nagkasabot nga mag-abot sa usa ka lugar sa Ermita nga niresulta sa pagkasikop niini.
Giingong maka baligya ang suspek og 20 ngadto sa 40 gramos matag semana gikan sa iyang supplier nga gisubay pa kung kinsa kini.
Kalapasan sa balaod batok sa gidiling drugas ang ipasaka batok sa suspek, lakip sa pagsusi kung kinsa ang iyang agalon ug kinsa usab ang iyang mga kustomer. / AYB