Nahabwa ang tinai sa usa ka 22 anyos nga ex-convict human gidunggab sa iyang 20 anyos nga ig-agaw tungod sa P35 nga utang alas 8:30 sa gabii, Lunes, Marso 10, 2025, sa Villa Bulsita, Barangay Bulacao, Dakbayan sa Sugbo.
Ang biktima nga si Ryan Recto, anaa sa kritikal nga kahimtang sa Talisay District Hospital.
Ang suspek nga si Christopher Cabilis alias “Potpot,” gitanggong na sa Inayawan Police Station.
Unang nitahan si Potpot sa mga tanod sa Barangay Bulacao human sa krimen, una pa siya gi-turnover sa kapulisan.
Si Potpot nga nahinabi sa Superbalita Cebu niangkon sa krimen.
Matod niya nga igo ra siyang nidepensa sa iyang kaugalingon kay nasuko ang iyang ig-agaw tungod sa iyang utang nga P35 niadtong miaging semana kay iyang gipalit og pan ug silang duha ang nagkaon niini.
Apan gipaninglan siya sa Lunes sa gabii og iyang gibalibaran ang biktima kay wala siyay kuwarta hinungdan nga nasuko hinungdan nga nahitabo ang sinumbagay og nalupig siya.
Tungod sa kahadlok, nidagan ang suspek paingon sa ilang panimalay og nikuha og sundang.
Pagkataudtaod, naabot ang iyang ig-agaw og iya kining gisugat og dunggab sa tiyan.
Sumala sa suspek nga wala siyay plano nga mopatay.
Nidepensa ra siya sa iyang kaugalingon kay bunalan siya og dos-for-dos sa biktima hinungdan nga iyang giunhan.
Nangayo siya og pasaylo sa iyang nahimong kremin.
Gibutyag sa suspek nga ang biktima maoy nagdunggab kaniya niadtong 12 anyos pa siya og nahabwa sab ang iyang tinai niadtong higayuna uban sa iyang igsuong babaye.
Sigon niya nga gipangdunggab sila sa biktima samtang natulog.
Dugang niya nga iya nang gipasaylo ang iyang ig-agaw nga iyang gihulagway nga tiggamitan og ilegal nga drugas.
Siya niingon nga napriso na kaniadto sa Operation Second Chance sa Kalunasan ang biktima sulod sa walo ka tuig og bag-o lang nakagawas sa miaging tuig. / GPL, DVG