Bisan sa pangatarungan sa 34 anyos nga lalaki nga gipasanginlan nga nanghinol sa pribadong bahin sa lawas sa iyang step daughter nga 14 anyos, gibalhog ang suspek sa Mabolo Police Station.
Nahitabo ang insidente alas 1:44 sa kaadlawon, Miyerkules, Hunyo 4, 2025, sulod sa ilang balay sa Barangay Apas, Siyudad sa Sugbo nga giingon nga gihinol ang dughan ug nimolestiya sa biktima.
Pagkaalas 2:30 sa hapon sa susamang adlaw, nitug-an ang biktima sa iyang inahan sa gihimong pagbinastos sa iyang ama-ama ngadto kaniya ug nidangop sila sa barangay nga mao na sab ang nagpahibalo sa kapulisan.
Sa dihang nadakpan ang maong suspek nga usa ka company driver sa electric company, hugtanon niyang gipanghimakak ang pasangil.
Matod pa nga nag-istoryahanay siya ug ang biktima labot sa uyab niini ug gipangutana kon aduna ba siyay sex scandal sa iyang cellphone kay matod pa namugos nga motan-aw ang dalagita.
Sa ilang pagpanghigda aron nga mangatulog, nahikapan sa suspek ang dughan niini.
Wala ang inahan sa biktima kay nanarbaho panahon sa gabii ug sila lang duha ang mahabilin nga matulog sa balay.
Sigon pa sa suspek nga natingala na lang siya nga sa iyang pag-uli nianang hapon aduna nay nangita niya nga tanod uban niini ang polis sa Mabolo.
“Wala man nako na tuyoa, human niya natan-aw ang video nangatulog nami 'nya ang iyang kamot niagbay sa akong bukton mao to nahikapan nako ang iyang dughan,” matod pa sa suspek.
Bisan pa man, nangayo gihapon siya og pasaylo sa biktima kay alang niya dili niya intensiyon nga mahikapan ang dughan. / AYB / JDG