Sa ikawalong higayon, gibasura sa Office of the Ombudsman Visayas ang laing reklamo nga naghagit sa pag-asumir sa katungdanan ni Cebu City Mayor Raymond Alvin Garcia.
Sa report nga giaprubahan niadtong Enero 27, 2025, ang anti-graft body nihukom batok sa reklamo nga gisang-at sa walo ka kanhi mga empleyado sa City Hall kinsa nangangkon nga supak sa balaod ang pag-asumir ni Garcia sa katungdanan tungod sa wala pahibaw-a sa Department of the Interior and Local Government (DILG) 7 sa pagpalagpot ni kanhi mayor Michael Rama.
Ang Ombudsman, bisan pa, nagpamatuod pag-usab sa una nga posisyon niini nga ang mga administratibong desisyon gipatuman dayon ug wa kinahanglana ang interbensyon sa DILG.
“A decision of the Office of the Ombudsman in administrative cases shall be executed as a matter of course,” sumala sa Ombudsman.
“The refusal or failure by any officer without just cause to comply with an order... shall be a ground for disciplinary action,” duhang niini.
Gihinganlan sab sa reklamo mao sila si DILG 7 Director Leocadio Trovela, Cebu City Human Resource and Development Office head Henry Tomalabcad, kanhi Cebu City Police Office Director Col. Antonietto Cañete ug City Legal Officer Santiago Ortiz Jr.
Ang mga reklamante mao sila si Robert Barquilla, Lemuel
Felisario, Teofilo Rosaroso Jr., Glicerio Germudo Jr., Lester Joey Jap Beniga, Vicente Esmeña, Mark Lester Ceballos, ug Nelyn Pizarr nangatarungan nga supak sa balaod ang pangagpas ni Garcia nga nangangkon nga ang DILG 7 wala pahibaw-a sa dismissal ni kanhi Mayor Michael Rama.
Apan, gisubli sa Ombudsman nga ang mga administratibong desisyon niini kay ipatuman dayon ug wala magkinahanglan og interbensyon sa DILG alang sa pagpatuman.
Kining pinakaulahi nga resolusyon maoy nagtimaan sa ikawalong higayon nga gibasura sa Ombudsman ang reklamo nga nagkuwestiyon sa lehitimo ni Garcia isip mayor.
UBANG REKLAMO
Ang tanang nangaging mga reklamo nga gisang-at sa lainlaing mga indibidwal ug grupo gibasura tungod sa kakuwang sa merito, pagkawalay ebidensya, o sayop nga paghubad sa legal nga mga pamaagi.
Lakip sa mga na-dismiss nga kaso mao ang gikan sa mga nagreklamo:
○ Mark Lester Ceballos, Glicerio Germudo Jr., ug Lemuel Felisario — Ang ilang reklamo nga nagtumbok sa ilegal nga termination ug usurpation of authority gibasura tungod sa kakulang sa merito.
*Homer Cabaral, kanhi pangulo sa Office of Senior Citizens Affairs — Ang iyang petisyon nga naghagit sa iyang pagtaktak ug hurisdiksyon sa Ombudsman nakita nga walay basehan.
○ Vicente Esmeña ug Teofilo Rosaroso Jr. — Gisalikway ang mga akusasyon sa illegitimate assumption diin gisuportahan sa Ombudsman ang katapusan sa mga hukom niini.
○ Collin Rosell, kanhi administrador sa lungsod - Ang iyang daghang mga alegasyon, lakip ang arbitraryong pagkabilanggo, gisalikway tungod sa kakulang sa legal nga pundasyon.
○ Mikel Rama, anak ni kanhi mayor Michael Rama — Ang iyang mga pasangil nga grave misconduct ug falsification gibasura, uban sa pagklaro sa Ombudsman nga dili kinahanglanon ang pagkahibalo sa DILG.
○ Kristian Hassamal, Vicente Esmeña, ug Mark Lester Ceballos — Nabasura ang pagkuwestiyon sa appointment ni City Legal Officer Ortiz human gipamatud-an sa Ombudsman ang legalidad ubos sa Local Government Code.
○ Usa ka wala mailhi nga reklamante - Giakusahan si Garcia sa usurpation ug dili husto nga pagbutyag sa kompidensyal nga kasayuran, nga gibasura tungod sa kakuwang sa ebidensya.
Nahimong hingpit nga mayor si Garcia niadtong Oktubre 9, 2024, nunot sa final ug executory decision sa Ombudsman nga gibasura si Michael Rama sa serbisyo sa gobiyerno tungod sa nepotism ug grave misconduct—partikular sa pagkuha sa duha niya ka bayaw samtang anaa sa katungdanan.
Si Rama usab kanunay nga na-disqualify sa pagkupot sa katungdanan sa publiko. / JPS