HUMAN ang kapin unom ka tuig, hingpit na nga misira ang usa sa labing ilado nga restobar sa IT Park sa Dakbayan sa Sugbo.
Ang The Park Social misira na niadtong Martes, Pebrero 20, 2024, human nga wala na kini gipa-renew sa ilahang abang sa maong luna sa management sa IT Park.
Matod sa director sa The Park Social nga si Phillip Yieh nga kapin sa tunga sa tuig sila nga nakigsabot sa kadagkuan sa IT Park apan daw mihatag ra kini og daghang rason.
“We are willing to stay,” pagbutyag ni Yieh atol sa pakighinabi niini sa media kagahapon.
Ang corporate lawyer usab sa maong kompanya nga si Atty. Jun Montecillo nagkanayon nga daghan og rason ang gihatag ang kadagkoan sa IT Park subay sa wala na niini pagpa-renew sa ilang kontrata.
Lakip sa mga rason nga gibutyag niini kay daw lakip ang maong dapit sa rota sa Cebu Bus Rapid Transit Project ug daw buhatan nila og bag-o nga konsepto ang maong luna.
“(The) Park Social has been an icon in IT Park,” masulob-on nga pagsaysay ni Montecillo.
Nasayran nga moabot sa 70 ka empleyado ang apektado sa maong pagsira sa maong branch.
Matod sa management sa The Park Social nga ang katunga sa mga empleyado niini ibalhin ngadto sa Ayala Center Cebu branch samtang ang uban ipaubos sa short-term trainings sa nagkadaiyang mga partners niini sa laing nasod.
Samtang pipila kanila ang mawad-an na og trabaho.
Nagtuo hinuon si Yieh nga daghan sila og loyal mga kustomer nga mobalik kanila atol sa magbukas na unya sa ilahang laing branch diin target nila nga mobukas karong Hulyo.
Wala pa hinuon niini gibutyag kon asa nga dapit apan magpabilin kini nga anaa sa Dakbayan sa Sugbo.
Naila nga Filipino restobar, moabot sa 80 porsyente sa kustomer sa The Park Social mga Pinoy.
Unang gibuksan ang maong restobar niadtong Oktubre 17, 2017.
Kapin sa duha ka tuig kini nga nahunong ang operasyon tungod sa pandemya ug Bagyong Odette.