Giklaro ni Senate President Francis “Chiz” Escudero nga wala’y kalambigitan si Presidente Ferdinand “Bongbong” Marcos Jr., sa pagdelatar sa pagpresentar sa Articles of Impeachment batok ni Bise Presidente Sara Duterte ngadto sa Senado.
Sa press conference niadtong Lunes, Hunyo 2, 2025, si Escudero nagkanayon nga ang pagbasa sa mga reklamo sa impeachment batok kang Duterte nga gitakda unta sa Hunyo 2, giuswag ngadto sa Hunyo 11 human sa konsultasyon uban sa ubang mga senador pagkahuman sa miting sa Legislative-Executive Development Council (Ledac) niadtong Mayo 29, nga gitambungan sab ni Marcos.
“No, it did not,” tubag ni Escuder sa pangutana kon base sa kamanduan sa presidente ang paglangan sa impeachment.
Gipamatud-an sab ni Escudero nga ang iyang tumong nga mapadayon ang paglingkod isip Senate President sa ika-20 nga Kongreso wala’y labot sa maong paglangan.
Gipasalig niya nga ang pagbalhin sa iskedyul tungod sa panginahanglan nga unahon ang pagpasa sa mga prayoridad nga balaudnon ubos sa administrasyon sa dili pa matapos ang ika-19 nga Kongreso sa sine die adjournment sa Hunyo 14.
Samtang sa The Hague, Netherlands, nipadayag og kalipay ang igsuong babaye sa presidente nga si Senador Imee Marcos nga kaalyado ni Duterte sa paglangan sa impeachment court.
“Para sa akin, ‘yan ang importante, makatulong sa tao at tigilan na ang pangunguna ng pampulitikang impeachment na ‘yan,” matod pa ni Sen. Marcos. / TPM / SunStar Philippines