Gipahibalo ni Senate President Francis “Chiz” Escudero sa Martes, Hunyo 10, 2025, nga ang impeachment trial ni Bise Presidente Sara Duterte magsugod sa 20th Congress.
Gisultihan ni Escudero ang mga tigbalita nga dili mahimo ang paghusay sa 19th Congress tungod sa kakulang sa oras. Ang 19th Congress gikatakdang mo-adjourn sine die karong Hunyo 14.
Bisan pa niini, ang impeachment court magtigom ning Miyerkules, Hunyo 11, uban ni Escudero nga maoy mangulo ug ang mga senador nga magsilbing huwes.
Nanumpa si Escudero isip presiding officer atol sa plenary session niadtong Hunyo 9. Ang mga senador-huwes nanumpa ning Hunyo 10.
Ang 20th Congress ablihan karong Hulyo 28, dungan sa ikaupat nga State of the Nation Address (Sona) ni Presidente Ferdinand “Bongbong” Marcos Jr.
Si Senate Majority Leader Francis Tolentino nag-file og resolusyon nga nagsugyot og 19 ka mga adlaw sa kalendaryo aron masuportahan ang due process ug masiguro ang tukmang panahon sa pagsulbad sa impeachment case.
Mao kini ang gisugyot nga iskedyul ni Tolentino:
1. Hunyo 11: Pagtukod sa impeachment court
2. Hunyo 11-21: Pagsumiter sa tubag ni Bise Presidente Sara Duterte
3. Hunyo 22: Tubag sa mga piskal
4. Hunyo 23: Pagsumiter sa trial briefs (buntag); Opening statements (hapon)
5. Hunyo 24-25: Presentasyon sa ebidensya sa prosekusyon
6. Hunyo 25-26: Presentasyon sa ebidensya sa depensa
7. Hunyo 27: Rebuttal sa prosekusyon (buntag); Rebuttal sa depensa (hapon)
8. Hunyo 28: Oral arguments (Usa ka oras matag usa alang sa depensa ug prosekusyon)
9. Hunyo 29: Closed-door meeting sa mga senador-huwes
10. Hunyo 30: Paghukom./ TPM / SunStar Philippines