Usa ka inahan ug iyang anak nga lalaki ang nasikop sa buy-bust sa Sitio Taytayan, Barangay Buhisan, siyudad sa Sugbo, alas 7 sa gabii, Huwebes, Agusto 15, 2024.
Ang mga suspek nabutang sa target-listed individual sa kapulisan nga sila si Scifi Castaño, 29, ug ang iyang inahan nga si Jade Castaño, 47, usa ka balut vendor.
Nihimo sa operasyon mao ang hiniusang pwersa sa Philippine Drug Enforcement Agency (PDEA) 7 Regional Special Enforcement Team, kapulisan sa Parian Police Station ug Joint Task Group Cebu 3ID Philippine Army Striker.
Nasakmit gikan sa mga suspek ang pito ka mga pakete sa gituohang shabu nga motimbang og 12 gramos nga dunay estimated average market value nga P81,600 lakip na ang buy-bust money ug ang usa ka cellphone.
Matod ni Leia Alcantara, information officer sa PDEA 7, nga tulo ka semana nila nga gipaubos sa case build-up ang inahan ug anak human makadawat ang kasayuran gikan sa kasaligang tinubdan.
Giingon nga makabaligya ang duha og 10 ngadto sa 25 gramos matag semana gikan sa usa ka supplier niini.
Si Scifi maoy target sa operasyon human nabutang kini sa listahan sa kapulisan ug sa PDEA 7 samtang ang inahan nga si Jade nabutang usab sa listahan sa barangay Buhisan.
Kalapasan sa Republic Act (RA) 9165 o Comprehensive Dangerous Drugs Act of 2002 ang gikatakda nga ipasaka sa PDEA 7 batok sa inahan ug anak. / AYB