Carmen, Cebu.
Carmen, Cebu.Google map

Inahan giatake sa anak nga nagmaoy

Usa ka 56-anyos nga babaye hapit mawad-i sa iyang ngipon ug nakasinati og hubag nga mga ngabil human giatake sa iyang anak samtang nanglaba alas 10:40 sa gabii niadtong Huwebes, Enero 4, 2024, sa Sityo Banker 1, Barangay Baring, lungsod sa Carmen, amihanang Sugbo.

Ang suspek giila nga si Ro­diemel Colipano Guiroy, 34, ulitawo, giingong nipasangil sa iyang ginikanan nga ires­ponsable.

Matod ni Lourina, inahan ni Rodiemel, nga sa wala pa ang insidente, nipauli ang iyang anak aron manihapon human nigawas uban sa mga higala aron mag-inom.

Apan si Lourina niingon nga si Rodiemel giingong nagsige’g bagulbol ug singgit samtang nagkaon hinungdan nga iyang gitawag ang atensyon aron pahilumon.

Apan nibarog ang suspek ug giatake siya.

“Nibarog ang suspek giduol iyang inahan nga naglingkod kay nanglaba. Gipatiran niyang nawong, nabulintang intawon. Kulatahon na unta niyag balik apan nakadagan ang mama,” asoy ni Police Chief Master Sergeant Arniel Manos sa Superbalita Cebu.

Nanginlabot ang ilang mga paryente ug silingan ug nanawag og pulis.

Nakuha sa mga ningresponde’ng polis ang duha ka mga kutsilyo gikan sa posesyon ni Rodiemel atol sa pagrekisa.

Mag-atubang og kasong slight physical injuries ug kalapasan sa Batas Pambansa Bilang 6 (Concealing Deadly Weapon) ang suspek nga habal-habal driver.

Si Manos, imbestigador sa Carmen Police Station nga nahinabi sa Superbalita Cebu, nagkanayon nga si Lourina mopasaka og kaso batok kang Rodiemel ug dili niya kini pasayluon tungod kay kanunay kining mokulata kaniya ug sa iyang bana matag mahubog.

Nasayran nga wala giseryuso sa suspek ang iyang pag-eskuyla hinungdan nga nakahuman lang kini og high school ug wala na mopadayon sa kolehiyo.

Bisan pa, ang inahan niingon nga bisan pa nga siya usa ka mag-uuma ug ang iyang bana nagtrabaho sa konstruksyon, naningkamot sila sa pagpaeskwela sa ilang mga anak hangtod sa high school.

“Nagmahay daw siya, walay ayo iyang ginikanan,” matod ni Manos. / TPT

Related Stories

No stories found.
SunStar Publishing Inc.
www.sunstar.com.ph