Nagbangutan nga inahan nangayo og hustisya sa kamatayon sa iyang 6-anyos nga anak nga babaye, kinsa namatay duha ka adlaw human nasakit tungod sa giingong pagkaon og butong nga dunay tubig niini sinagulan og gatas ug asukar, usa ka matang sa dessert nga nailhan nga “lamaw.”
Si Mylene Faburada, 43, attendant sa usa ka burger store duol sa usa ka unibersidad sa dalan P. Del Rosario sa dakbayan sa Sugbo, taga Barangay Sapangdaku, nipadayag sa iyang kasagmuyo sa Cebu City Medical Center (CCMC) sa pakighinabi sa Superbalita Cebu.
Matod niya nga buhi pa unta ang iyang anak kon nahatagan pa siya og dextrose sa CCMC.
Ang hepe sa tambalanan, Dr. Peter Mancao, nitug-an sa SunStar Cebu pinaagi sa text message sa Dominggo, Abril 7, 2024, nga ilang giimbestigar ang insidente, niingon nga sila mopatawag og tigom karong adlawa, Abril 8, aron sa pagtino sa timeline.
TIMELINE
Matod ni Faburada nga niadtong Marso 31 sa buntag nikaon ang iyang anak sa dessert nga lamaw nga hinatag sa ilang silingan.
Pagkagabii, ang bata nireklamo sa kasakit sa tiyan, hinungdan nga gidala siya sa pamilya ni Faburada sa usa ka doktor sa Barangay Guadalupe, diin giresetahan sila og tambal.
Tungod kay wala pa naulian ang bata niadtong Abril 1 sa buntag, si Faburada niingon nga nibalik sila sa doktor, kinsa nirekomendar nga ipa-admit ang bata sa CCMC.
Matod ni Faburada nga sa pag-abot nila sa tambalanan pasado alas 8 sa gabii sa samang adlaw, naghulat sila og pipila ka oras sa wala pa sila gihatagan og medikal nga reseta.
Gipalit dayon nila ang giresita nga tambal nga gi-inject sa iyang anak nga babaye, nga kamanghuran ug bugtong babaye sa lima ka magsuon, ingon niya.
Kaniadtong Abril 2, ang complete blood count ug mga resulta sa pagsulay sa ihi nipakita nga normal, ug gisultihan sila nga mopauli.
“Luya man ako anak. Gusto niya mata-uran siya’g dextrose. Dili siya ganahan nga mogawas sa hospital pero gipapauli man mi,” ni Mylene.
Human sa pagproseso sa mga papeles sa Malasakit Center, nakagawas na sila sa tambalanan.
Apan matod ni Faburada nga sa ilang pag-abot sa ilang balay nisulirap ang mga mata sa iyang anak hinungdan nga nibalik sila sa CCMC apan wala madugay namatay kini.
“Natingala ko nga pneumonia man daw namatyan sa akong anak. Gisakitan ra man siya sa tiyan,” sumala ni Faburada.
Si Faburada niingon nga gusto nila nga manubag ang mga doktor nga nag-atiman sa iyang anak nga babaye.
Matod niya nga buhi pa unta ang iyang anak kon nahatagan pa siya og dextrose.
Dugang pa niya nga tungod kay malingaw kaayo sila sa bata -- nga ganahan mosayaw sa TikTok -- walay kabutangan ang iyang kaguol. / GPL, dugang taho ni AML