Senior citizen nasikop sa kasong rape
SunStar Cebu City

Inahan nakaanak sa daplin sa dalan

Usa ka inahan nga mabdos ang wala na makahuwat nga madala sa tambalanan ug nanganak sa daplin sa dalan sa Sitio Brahmans, Barangay Mambaling, dakbayan sa Sugbo, alas 6:13 sa buntag, Miyerkules, Hunyo 26, 2024.

Nabantayan ni sa usa ka fire volunteer sa Mambaling nga si Renante Cartagena nga kaanakon na ang ginang nga maoy hinungdan nga iya ning gipahigda sa lamisa sa kilid sa dalan ug gitabangan nga mogawas ang himsog nga batang babaye.

Human mahimugso ang bata, gidala kini sa tambalanan.

Ang ngalan sa nanganak mao si Warmelie Rocamora 37 anyos nga taga Mamba­ling nga padung na unta nga mosakay og taxi kay moadto sa paanakan kay nagbati.

Matod ni Cartagena, nabantayan niya nga migawas na ang bata nga maoy hinungdan nga iya nalang kini nga gitabangan nga makaanak.

Sa interview sa dyHP RMN Cebu, giangkon ni Cartagena nga nakasaksi na siya unsaon pagtabang sa mga manganak kay ang iyang igsuong babaye naa sa health center nagtrabaho diin dunay mga panahon nga manabang kini sa pag- paanak.

“Ang akong igsuon magpaanakay man sad sa health center. So, nakat-on na lang sad ko kay sige kog tan-aw.." matod ni Cartagena.

Human nga nakagawas ang bata, sigon ni Cartagena nga iyang gipikpik ang sampot ani aron mohilak ang bata.

Ang amahan sa bata nga si Roberto Acuña, 29, mibutyag nga alas 5 sa kaadlawon sa Miyerkules nagsakit ang tiyan sa iyang live in partner.

Iyang giangkon nga ikapito na nila nga anak ang bag-ong gihimugso, upat niini mga lalaki samtang tulo ang babaye.

Nanawag na lang sila og ambulansya aron madala sa tambalanan apan giputlan una kini og pusod. / AYB

SunStar Publishing Inc.
www.sunstar.com.ph