NAKABSAN sa kinabuhi ang 79-anyos nga lola og usa ka Indian national sa managlahing aksidente sa Dakbayan sa Sugbo sa Lunes, Hulyo 21, 2025.
Unang disgrasya nahitabo mga alas 4 pasado sa kaadlawon sa may Archbishop Reyes Avenue diin usa ka senior citizen ang nabanggaan og motorsiklo samtang nilabang sa dapit.
Nailhan ang biktima nga si Leonica Jamero, biyuda ug giingong usa ka mamasurahay nga residente sa P3 Lower Back Solid Escario, Barangay Kamputhaw, Dakbayan sa Sugbo.
Subay sa imbestigasyon sa Traffic Enforcement Unit kon TEU, gikataho nga samtang nagmaneho sa iyang motorsiklo si Chayle Kim Lumpas, 24, padulong motrabaho, wala siya makabantay nga nilabang ang biktima.
Atol sa pakighinabi sa drayber, nibutyag kini nga ulahi na siya nakabantay sa biktima ug naalanganin na siya sa pag-brake hinungdan nga iya kining nabanggaan.
Gituohang tungod sa impact, nalagpot ang maong tiguwang nga niresulta sa pagkaigo sa iyang ulo ngadto sa karsada.
Gidala pa ang biktima sa tambalanan apan namatay alas 6:30 sa buntag tungod sa internal hemorrhage, matod sa kabanay.
Nisaad ang drayber sa motor nga moabaga sa galastuhan ug nagkasinabot ra ang duha ka habig.
Sa pikas bahin, mga alas 5:10 sa kabuntagon, gitubag sab kini og laing disgrasya nga gilangkuban sa usa ka Indian national nga nagmotorsiklo nga gituohang nabangga sa railings sa flyover sa Gov. M. Cuenco, Barangay Banilad.
Atol sa pagresponde sa mga sakop sa TEU, nag-ubo na ang langyaw nga si Chetan Halvidiya, 24-anyos ug daghan ang dugo nga nigawas sa iyang ulo.
Si Mistry Niraj, higala sa maong biktima, nisaysay nga gikan sila sa club nag-inom ug padulong na unta sila mopauli dihang nahitabo ang disgrasya.
Nidugang si Niraj nga puros sila nagmotorsiklo og nagsunod siya sa biktima, apan matod niya nga kusog ang dagan sa biktima ug sa pag-abot sa flyover, iya na lang naabtan si Halvidiya nga nag-ubo sa karsada og nigawas ang dugo sa ulo niini.
Gisuwayan pa og dala sa Pertpetual Succor Hospital si Halvidiya apan tungod sa grabing kadaot sa ulo niini apan nakabsan sa kinabuhi. / JDG