Gikonsiderar sa kapulisan sa Siyudad sa Sugbo nga sulbad na ang pagpatay kang Leo Leaño, 57, kansang patayng lawas napalgan sa Barangay Sudlon 1 niadtong Huwebes, Septiyembre 3, 2026, human nadakpan ang tulo sa upat ka mga suspek.
Matod ni Police Lieutenant Colonel Gerard Ace Pelare, lig-on ang kasong ilang gipasaka aron masegurong makombikto ang mga suspek.
“Once ma-file ang kaso we consider it as solved, but we can assure you that we will file are airtight cases nga dili lang para file korte, our intention is to make sure that the pieces of evidence or the case that will be filed will bring the suspects to conviction,” matod ni Pelare.
Nadakpan sa managlahing operasyon ang giingong lider nga si Ritchie Calunsag, drayber nga si Eleazar Nace, ug ang gunman nga si John Elvis Gutobat.
Unang nadakpan niadtong Sabado sa kaadlawon mao silang Calunsag, 49, ug Nace, 49.
Pagka Dominggo sa gabii, nadakpan sab si Gutobat, 31.
Giangkon ni Gutobat nga siya ang nipusil kang Leaño makaduha ka higayon gamit ang Ingram nga armas sa sugo ni Calunsag kinsa matod pa maoy nakig-alayon sa usa ka middle man sulod sa Cebu City Jail. Matod sa mga suspek, P50,000 ang kinatibuk-ang suhol sa krimen ug away sa yuta ang ilang nasayran nga motibo.
Padayon pang gipangita sa mga awtoridad ang ikaupat nga suspek nga at large pa karon. / AYB
