Depensaan na ni Japanese Naoya “Monster” Inoue ang iyang undisputed super bantamweight title batok ni Irishman TJ Doheny karong gabii, Martes, Septiyembre 3, 2024, sa Ariake Arena sa Tokyo, Japan.
Mao kini ang unang away ni Inoue human sa makasaysayon niyang 6th round TKO nga kadaugan batok ni Mexican Luis Nery nga gipahigayon atubangan sa 55,000 nga mga tumatan-aw sulod sa Tokyo Dome niadtong Mayo 6, 2024.
Ning higayuna, moaway si Inoue sa mas gamay nga venue apan alang kaniya, wala’y nausab sa iyang kahinam nga protektahan ang World Boxing Coucil (WBC), World Boxing Organization (WBO), International Boxing Federation (IBF) ug World Boxing Association (WBA) super bantanweight titles.
Gipasabot ni Inoue nga bisan asa, magpanikad siyang moaway hilabi na batok sa dekalidad nga kontra sama ni Doheny, kinsa maoy naggunit sa IBF super bantamweight belt gikan niadtong 2018 hangtod 2019.
Sa labing ulahi niyang away, si Inoue nakasinati og 1st round knockdown batok ni Nery nga maoy labing unang higayon nga natumba siya ibabaw sa ring.
Hinuon, nibangon si Inoue gikan ning maong pagkatumba ug namungot hangtod nga iyang napaundang si Nery.
Batok ni Doheny, grabe ka inilog si Inoue apan dili ikalimod nga sa boksing, puwedeng mausab ang dagan sa estorya sa usa lang ka kumo.
Si Inoue adunay 27-0, 24KOs nga rekord samtang si Doheny naghupot og 26-4, 20KOs nga rekord. / ESL