Napiling 2023 Fighter of the Year sa Maxboxing si Japanese Naoya “Monster’ Inoue gumikan sa iyang pagkahimong two-division undisputed world champion.
Si Inoue maoy ikaduha pa lang nga boksidor sa kasaysayan sa boksing nga nakabaton og undisputed titles sa duha ka managlahing weight divisions sunod ni American Terence Crawford.
Nahimong undisputed champion si Inoue sa bantamweight ug super bantamweight divisions.
Mas una man tuod nga nahimong two-division undisputed champion si Crawford sa niaging tuig apan si Inoue maoy napili sa Maxboxing nga pasidunggan gumikan kay naangkon niya ang talagsaong kalampusan sulod lang sa duha ka mga tuig.
Tawagon nga undisputed champion ang usa ka boksidor kon maharos niini paglabni ang upat ka mayorihiyang mga titulo sa usa ka timbang nga mao ang World Boxing Council (WBC), World Boxing Association (WBA), World Boxing Organization (WBO) ug International Boxing Federation (IBF).