Kon abilidad ang hisgutan, gihulagway ni Filipino Jerwin Ancajas ang iyang umaabot nga kontra nga si Japanese Takuma Inoue nga sama sa iyang maguwang nga si super bantamweight undisputed champion Naoya “Monster” Inoue.
Matod ni Ancajas nga ang nakalahi lang, hinay og kumo si Takuma kumpara ni Naoya.
“Si Takuma parehas sila talaga ng style ng kapatid niya. Pero may lakas lang talaga yung kuya,” matod ni Ancajas nga napatik sa Spin.ph. “Ganun ang nakita ko sa kanya (Takuma).”
Apan gitino ni Ancajas nga wala kini nagpasabot nga wala siya’y respeto sa kusog ni Takuma.
Ang duha mag-abot ibabaw sa ring karong Sabado, Pebrero 24, 2024, sa Tokyo Dome sa Japan diin depensaan ni Takuma ang iyang World Boxing Association (WBA) bantamweight title batok ni Ancajas, kanhi world super flyweight king.
“Sa taas ng ring dun na lang kami mag-a-adjust,” asoy ni Ancajas.
Si Ancajas naggunit og 34-3-2, 23KOs nga rekord samtang si Takuma naghupot og 18-1, 4KOs nga baraha.