Nahimong ikaduha sa kasaysayan sa natad sa boksing nga na-unify ang mga titulo sa duha ka mga division si Japanese Monster Naoya Inoue human niya paludha sa 10th rd. si Pinoy boxing champ Marlon Tapales sa ilang super bantam unification bout sa Martes sa gabii, Disyembre 26, 2023 sa Tokyo, Japan.
Niini, nakuha ni Inoue, kinsa champion sa WBO ug WBC, ang duha ka mga bakos ni Tapales sa WBA ug IBF.
Siya ang ikaduhang boksidor nga nahimo’ng unified champion sa duha ka mga division. Ang una mao si Terrence Crawford nga nihimo niini niadtong Hulyo.
Apan mas paspas ang pag-angkon ni Inoue sa mao nga record kay gihimo kini niya sulod lang sa dul-an duha ka mga tuig. Una niyang na-unify ang kampeyonato sa bantam division.
Unang natumba si Tapales sa 2nd round apan gi-rule sa referee nga slip apan sa ikaupat nga round, usa ka left hook ug mga kombinasyon ang nitumba kang Tapales.
Bisan niini, nakabangon pa si Tapales ug nakahatag og maayong away ni Inoue ug nipasulod usab og bug-at nga mga kinumo.
Apan sa 10th round, usa ka right cross ni Inoue ang nakaigo ug nipaluhod kang Tapales ug niini, wa na siya nakabarog pa alang sa count.