Si Japanese pound-for-pound star Naoya “Monster” Inoue maoy dako’ng inilog kontra kang Filipino Marlon Tapales sa ilang unification bout sa Ariake Arena, Tokyo, Japan karong Disyembre 26, 2023.
Ang 12-round nga sangka nila ni Inoue ug Tapales modeterminar sa unified champion sa 122 pounds nga dibisyon.
Kon basehan ang betting odds, padayon nga inilog ang Japanese fighter diin gilista siya nga -1600 o kon mopusta ka og $1,600 modaog ka lang og $100 base sa report sa Daily Tribune.
Samtang si Tapales gilista nga +800, pasabot nga kon mupusta og $100, mahimo kining $800 kon modaog ang Filipino boxer.
Pulos kampiyon ang duha ka boxers, ipusta ni Inoue ang World Boxing Council (WBC) ug World Boxing Organization (WBO) nga titulo samtang iparada ni Tapales ang World Boxing Association (WBA) ug International Boxing Federation (IBF) nga bakos.
Ang modaog maoy makapanag-iya sa upat ka mga major nga bakos.
Bitbit ni Inoue ang perpektong rekord nga 25-0, 22 KOs samtang si Tapales adunay 37-3, 19 KOs nga baraha.
Kon makalusot si Tapales niining awaya, mahimo siyang unang Filipino nga boksidor nga makakuha sa undisputed championship.