Aduna na’y kompirmadong venue alang sa panagharong nila ni Japanese Naoya “Monster” Inoue ug Uzbek Murodjon Akhmadaliev.
Ang undisputed junior featherweight championship bout ipahigayon sa state-of-the-art IG Arena sa Nagoya, Japan karong Septiyembre 14, 2025.
Si Inoue mosuway pagdepensa sa iyang fully unified junior featherweight title sa ikalimang higayon ug sa iyang World Boxing Council (WBC) ug World Boxing Organization (WBO) titles sa ikaunom nga higayon.
Sa labing ulahing away ni Inoue, nibangon siya gikan sa 2nd round knockdown aron paundangon si American Ramon Cardena sa 8th round niadtong Mayo 4 sa Las Vegas.
Batok ni Akhmadaliev, kinsa usa sa dekalidad nga mga boksidor sa Uzbekistan, gilauman nga makasugat na sab si Inoue og saktong binukbokay.
Si inoue adunay 30-0, 27KOs nga rekord samtang si Akhmadaliev adunay 13-1 10 KOs nga rekord. / ESL