Gihikay na’g sugod ang pagdepensa ni Japanese Naoya “Monster” Inoue sa iyang world super bantamweight undisputed title batok kang Mexican Luis Nery nga giplanuhang ipahigayon karong Mayo, 2024 sa Tokyo, Japan.
Sa taho sa badlefthook.com, nasayran nga niuyon na si Inoue nga isugal ang iyang World Boxing Council (WBC), World Boxing Association (WBA), World Boxing Organization (WBO), ug International Boxing Federation (IBF) super bantamweight titles batok kang Nery.
Adunay babag kining maong plano sa kasamtangan gumikan kay usa ka persona non grata si Nery sa Japan human kini nasuta’ng positibo sa usa ka drug test.
Hinuon, gipaneguro sa mga nagpasiugda nga malibkas ra ang pagka-persona non grata ni Nery sa Japan.
Gikonsiderar nga si Nery mao na lang ang bugtong labing kuyaw nga hudlat sa karera ni Inoue sa super bantamweight.
Si Nery naggunit og 35-1, 27KOs nga rekord samtang si Inoue adunay 26-0, 23KOs nga baraha.